त्रिभुवन विश्वविद्यालय, शिक्षा विकास तथा अनुसन्धान केन्द्र (सेरिड) को आयोजनामा उच्चशिक्षा र उद्योगविच सहकार्य गर्ने उद्देश्यले उद्योग तथा व्यवसायको क्षेत्रमा महत्वपूर्ण उचाईं हासिल गरेका व्यक्तित्वहरुसमेतलाई संलग्न गरी "Reimagining Higher Education For Nepal : Pathways to Innovation and Development 2026" शीर्षकको दुई (२) दिने राष्ट्रीय सेमिनारको आयोजना गरेको छ ।

कीर्तीपुर स्थित त्रिभुवन स्मृति भवनको सभाकक्षमा आयोजित राष्ट्रीय सम्मेलनको पहिलो दिन आयोजित Education- Industry Synergy : Bridging Learning, Innovation and Employability " अन्तर्गतको सत्रमा बरिष्ठ उद्योगपति एवं पञ्चकन्या ग्रुपका व्यवस्थापकीय निर्देशक प्रदिप कुमार श्रेष्ठ, गैरआवासिय नेपाली संघका संस्थापक अध्यक्ष डा.उपेन्द्र महतो एवं आइएमी ग्रुपको अध्यक्ष चन्द्र प्रसाद ढकालले उद्योग तथा व्यवसायको क्षेत्रमा आफ्नो अनुभव, भोगेका चुनौती एवं आगामी दिनका कार्ययोजनाहरु समेत सुनाउनुभएको थियो ।उद्योग तथा व्यावसाय समृद्ब मुलुकको आधारस्तम्भ रहेको उल्लेख गर्नुहुँदै उद्योग र उच्चशिक्षा सुमधुर सम्वन्ध निर्माण गर्नुपर्ने, उच्चशिक्षाले ज्ञान र सिप प्रर्वद्बन गर्नुपर्ने, विज्ञता र अनुभवलाई उद्योगसँग जोडनुपर्ने, देशमा उचित कार्यवातावरण निर्माण गर्नुपर्ने, उद्योगी र व्यवसायप्रतिको सकरात्मक भाष्य सिर्जना हुनुपर्ने, प्रविधिको प्रयोग र गुणस्तरीय सेवा प्रवाहलाई आत्मसात गरी मिहनेत र परिश्रमलाई बढावा दिनुपर्ने धारणा व्यक्त गर्नुभएको थियो ।

त्रिभुवन विश्वविद्यालयका उपकुलपति प्रा.डा सुशील बहादुर बज्राचार्यले विद्यार्थीहरुलाई समयानुकुल र रोजगारमूलक शिक्षा मार्फत औद्योगिक क्षेत्रका आवश्यकता अनुसार दक्ष एवं सक्षम जनशक्ति निर्माण गर्नुपर्ने धारणा व्यक्त गर्नुभयो । उहाँले त्रिभुवन विश्वविद्यालयले रोजगारीलाई केन्द्रीत गर्दै LMDP (Labor Market Driven Program ) अन्तर्गत रहेर पाठ्यक्रम निर्माणलाई प्राथमिकता दिएको बताउनुभएको थियो ।

राष्ट्रीय सेमिनारमा नेपाल खुला विश्वविद्यालयका पूर्वउपकुलपति प्रा.डा लेखनाथ शर्मा, त्रिभुवन विश्वविद्यालयका पूर्वशिक्षाध्यक्ष प्रा.डा खडग के.सी, विज्ञान तथा प्रविधि अध्ययन संस्थानका पूर्वडीन प्रा.डा विनिल अर्याल लगायतले कार्यपत्र प्रस्तुत गर्नुहुनेछ ।

राष्ट्रीय सेमिनारको उदघाटनसत्रमा शिक्षा विकास तथा अनुसन्धान केन्द्रका कार्यकारी निर्देशक डा.राजेन्द्र कुँवरले उच्चशिक्षा र उद्योगलाई निकट बनाउन,सम्पर्कलाई बढावा दिन, रोजगारी निर्माण गर्न र विश्वविद्यालयवाट उत्पादित जनशक्तिलाई बदलिदो परिवेश अनुसार आत्मविश्वासी र परिपक्व बनाउन राष्ट्रीय सेमिनारले महत्वपूर्ण शुरुवात गर्ने अपेक्षा ब्यक्त गर्नुभएको थियो । कार्यक्रममा पोखरा विश्वविद्यालयका पूर्वउपकुलपति प्रा.डा प्रेमनारायण अर्याल, नेपाल र एसियाली अनुसन्धान केन्द्र (सिनास) का कार्यकारी निर्देशक डा.मृगेन्द्र बहादुर कार्की, आर्थिक विकास तथा प्रशासन अनुसन्धान केन्द्र (सेडा)का कार्यकारी निर्देशक प्रा.डा अर्जुन कुमार बराल, व्यवहारिक विज्ञान तथा प्रविधि अनुसन्धान केन्द्र (रिकास्ट) का कार्यकारी निर्देशक प्रा.डा मीना राजभण्डारी लगायतले शुभकामना मन्तव्य व्यक्त गर्नुभएको थियो ।